Video Pernikahan, Seminar, Wisuda, Dokumenter, Profile Perusahaan / Organisasi, Event Outdoor / Indoor dan Segala Jenis Dokumentasi Audio Visual. Kami Abadikan Yang Terbaik Untuk Anda. ( SEUKEE Production 0812-691-6697 )

Hikayat


PEULARHA ALAM (JAGA BUMI DAN LINGKUNGAN)


Peularha Alam (Jaga Bumi dan Lingkungan)
Oleh:M.Y.Bombang

Wahe dum kawom dalam nanggroe nyoe
Wajeb geutanyoe bumoe ta jaga
Bak kayee lam gle peutheun ie ujeuen
Bek jikoh bandum nyan buet hapeha (HPH)

Meutan bak kayee dalam gle Tuhan
Sayang e rakan tanyoe binasa
Ie raya kayem oh musem ujeuen
Adoe ngon aduen geutanyoe rasa

Meunan cit cicem rimueng ngon cagee
Meutan bak kayee sayang lagoina
Bandum geutanyoe peuneujeut Tuhan
Peureulee aman udep lam donya

Alam lingkungan lam bumoe Tuhan
Sayang that rakan meutan ta jaga
Meunyo ka reuloh lingkungan alam
Geutanyoe mumang udep lam donya

Geutanyoe bandum gampong ngon peukan
Peudong bangunan atoran beuna
Bek ta doe parek ta peudong rumoh
Geutanyoe mehmoh oh ujeun raya

Peudong bangunan beuna atoran
Beu ek seusuai ngon alam lingka
Bek le ateuh krueng ta peudong rumoh
Geutanyoe mehmoh teuka ie raya

Bek tadoe laot peudong bangunan
Sayang e rakan oh badee raya
Parek deungon krueng kon keu teumpat broh
Pike rakan beuh yoh goh binasa

Aron meuriti di bineh pante
Jinoe hana le sayang lagoina
Han soe le peutheun anoe di pante
Sayang bukon le oh angen raya

Meunan cit rawa rab bineh pante
Bak bangka tan le jikoh dum rata
Eh noe meumada haba lon ca`e
Laot deungon gle haba lon rika

Bna :18-06-05

Hikayat:
SALEUM DAN DOA KEU SYEDARA TANGSE
Oleh:M.Y.Bombang (Apa Kaoy)

Salam alaikum kaom syedara
Tuha ngon muda nyang na di tangse
Saleum ngon doa kamoe di banda
Bandum syedara mulia hate

Ban kamoe deungo haba beurita
Badan sang geumpa hate sang reule
Cobaan Allah ateuh syedara
Teuka ie raya dari gle tangse

Bak tanggai siblah dalam buleun lhee
Uroe pih teuntee jeumeuat nyata
Dua ribee siblah thon pih ka teuntee
Le that bak kayee jitron dari gle

Ie pih meugrum-grum jiron dum kayee
Seureuta batee bandum asoe gle
Rumoh lam gampong han peu ta kira
Habeh dum jiba buet ie badee gle

Nyang hanco rumoh deungon hareuta
Han ek ta kira sayang bukon le
Nyang leupah seudeh ladom syedara
Ladom keuluarga nyawong hana le

Geutanyoe udep wahee syedara
Beu rayeuk saba di dalam hate
Ureung hana le nyang woe Tuhan
Allah bri seunang ta lakee doa

Ya Ilahi wa Ya Rabbi
Keu kamoe neu bri troh ban pinta
Syeadara kamoe nyang ka geu ili
Ya Allah Neubri teumpat mulia

Korban beuncana nyang mantong udep
Bek Neubri saket  E…Ya Rabbana
Iman beu kuat bek sosah udep
Raeuseuki beu sep E….Ya Rabbana

Banda Aceh,19 Maret 2011
Get Paid To Promote, Get Paid To Popup, Get Paid Display Banner SekolahFOREX.Net
Get Chitika | Premium
 
Copyright 2011© Sagoe Aceh. Design by dezier